Msichana apigwa risasi Gatundu, familia yataka haki

Msichana mmoja mwenye umri wa miaka 15 anauguza majeraha ya risasi huko Gatundu baada ya kupigwa risasi wakati wa vurugu zilizozuka katika mkutano wa umma. Inadaiwa kuwa watu wanaoshukiwa kuwa wahuni walivamia mkutano kuhusu mradi wa ujenzi wa Chuo cha Kiufundi cha Mangu. Mkutano huo ulikuwa umekamilika kwa amani, lakini vurugu zilizuka baada ya Mbunge wa eneo hilo, Elijah Njoroge, kuanza kugawa chakula kwa wakazi. Polisi walilazimika kurusha vitoa machozi na kupiga risasi hewani ili kutawanya umati. Msichana huyo alipigwa risasi mguuni akiwa ndani ya ua wa shule na baadaye akapelekwa katika hospitali mjini Thika, ambako risasi iliondolewa. Familia yake sasa inaitaka Mamlaka Huru ya Kusimamia Utendakazi wa Polisi (IPOA) kuingilia kati na kuhakikisha afisa aliyehusika anachukuliwa hatua.